Шымкент университетінде Білім күні аталып өтті.
Күздің алғашқы күні ерекше қуанышпен, толқумен күтетін мереке – Білім күнімен басталады. Бұл жемісті жұмыстың, білім мен жаңалықтардың таңғажайып әлемін түсінудің жаңа кезеңінің басталуы.
Шымкент университетінің ұжымы Білім алуға бел буып, жаңа өмірге қанат қаққан әрбір жасты құшақ жая қарсы алып, «Білім күнін» ерекше атап өтті. Шымкент университеті ұжымы мен білімалушыларын Білім күнімен құттықтау үшін «Аманат» партиясы, Қаратау аудандық филиялының атқарушы хатшысы Иманқұлов Әбдез Рахманұлы және университетіміздің ардагер ұстазы, педагогика ғылымдарының кандидаты, профессор Қалдыбаев Әбдімәлік Қалдыбайұлы арнайы қатысты.
Адами әлеуетті дамыту негізінде білікті маман даярлауда өз миссиясын жүзеге асырып келе жатқан Шымкент Университеті халық қамын, ел жайын ойлайтын ел ағаларының ізін басатын білімге құштар, шығармашылыққа жандары жақын жастарға білім беруде. Сіздерді осы атаулы мерекемен, яғни қызығы мен шыжығы мол студенттік өмірге алғаш рет басқан қадамдарыңызбен шын жүректен құттықтаймыз. Сіздерді жаңа білімге, ғылыми жаңалықтарға және шығармашылық өрлеуге толы қиын, бірақ қызықты және ұмытылмас студенттік шақ күтуде. Сіздердің көпшілігіңіз біздің университеттің дамуына елеулі үлес қосатындарыңызға күмәніміз жоқ!
